Crèsia de Santu Juanni

Sighende deretos in sa carrela de Santa Maria, atopamus una pratza in ue b'at unu portale ruju cun una rughe in mesu; prus a dae in antis de su portale b'at sa crèsia pro more de Santu Juanni chi est a forma de rughe romana. A dolu mannu oe no est possìbile a istabilire cale forma teniat a primu, ca sunt istados fatos traballos meda. In sas capellas, a ambas alas, bi sunt sas istàtuas de Sant Antoni Abate e Santu Sidore.
Ischimus chi su fràigu est de su medioevu gràtzias a s'iscritzione in una pergamena agatada cando si fiant faghende traballos in su 1927 e nche fiat istadu etadu s'artare. Semper in custa crèsia, in sos annos 80, sunt istados agatados: su panimentu de cotto, chi fortzis est mediavale e carchi soddu de su 1600. Unu particularidade de custa crèsia fiat sa presèntzia de una cobertura in foras chi beniat impreada comente ricòveru e amparu. In s'artare fraigadu cun pedra trachìtica ruja b'at s'istàtua de Santu Juanni Batista. Su Santu si festat su 24 de làmpadas, in antis de ddu festare si faghent sas nuinas.