Vai a sottomenu e altri contenuti

Atentzione a sos fogos

Prus atentzione, prus pagu fogos

In su 1300 a chie poniat fogu nche ddi segaiant sa manu dereta
si non pagaiat su dannu (Carta de Logu)


Cussu de sos fogos est semper unu problema mannu meda in s'istiu.
In custa istajone, cando non proet, sos àrbures si nche sicant e bastat pagu pro ddis fàghere pigare fogu.
Sas oras prus perigulosas sunt: dae sas 11 de manzanu a sas 6 de sero.

Si cherimus bene a s'ìsula nostra, faghimus.ddu a bìdere!!

Finas pro su 2013 sa Regione at aprontadu, comente aiat zai fatu sos annos in antis, unas cantas mesuras pro parare fronte a su problema de sos fogos. Pro assegurare una publitzitade de gabale, su manifestu est istadu apicadu in totus sos entes pùblicos, in sos comunes, iscolas, portos, aeroportos e istruturas turìstisticas de Sardigna.
Sas règulas cunfirmant cantu est istadu aprovadu s'annu passadu: si podet afoghizare dae su primu a su 30 de làmpadas e dae su 15 de cabudanni a su 31 de santugaine, cun su permissu de sos servìtzios territoriales de sa Forestale e solu si su tempus ddu permitit. In prus, si si presentant prozetos ispetzìficos a su Sìndigu e si issu ddos aprovat, si podent afoghizare terrinos prus mannos de 10 ètaros.

Mancari sos inditos dados dae sa Regione Sardigna siant de importu mannu in sa batalla contra de su fogu, tocat a nois a fàghere atentzione cando ddu manizamus, pro non portare dannu a cosas e pessones.

Comente ti deves cumportare si bides fogu

• Si bides pampa o mancari fumu ebbia, Tzèrria immediatu a su nùmeru birde 1515 de sa forestale, a su 113 de sa politzia e a su 112 de sos carabineris pro chi bi siat su tempus de aprontare totu pro dd'istudare; Non pentzes mai chi àtere dd'apat zai fatu;
• Si ischis cosa chi potzat azudare a iscobèrrere chie at postu su fogu, deves tzerriare sos nùmeros inditados in subra;
• Si bides chi est pighende fogu, deves chircare de dd'istudare cun chimuza, ma solu si ses seguru chi faghet a ti nche fuire;
• Non ti frimes a dd'abbaidare: su fogu no est un'ispetàculu;
• No abarres mai a inghìriu de su fogu o in logos in ue tirat bentu;
• Non rugres s'istrada prena de fumu o pampa;
• Non lasses sa màchina in mesu de s'istrada: devet abarrare lìbera pro fàghere passare sas màchinas pro istudare su fogu;
• no abarres in vatu de àteras màchinas e, si faghet, torra in dae in segus;
• nara a sas iscuadras de sucursu cales sunt sas istradas e sos camminos in ue est menzus a passare;
• pone a disponimentu de chie est istudende su fogu riservas de abba e àteras atretzaduras.

Si ses inghiriadu dae su fogu
• chirca de ti nche fuire o abarra in unu zassu seguru in ue non bi siat cosa chi diat pòdere leare fogu; abarra a una distàntzia chi siat a su nessi bator bortas prus manna de sa longhesa de sa pampa;
• rugra su fogu in ue b'at prus pagu pampa e passa in su tretu zai brusiadu;
• si ses in mare, abarra in s'ispiàgia e intra a s'abba, est su logu prus seguru;
• non chirches de coberare màchinas, moto, tendas o cantu b'at a intro; dias pòdere abarrare in mesu sena ti nche pòdere fuire;
• sinnala sa presèntzia tua;
• istèsia dae su fogu bòmbolas de gas e botos de lìcuidu chi podent leare fogu;
• non lasses sa domo si non ses seguru de ti nche pòdere fuire;
• istuda s'interrutore zenerale de sa lughe;
• sizilla cun paperi adesivu o pannos issustos ghennas e ventanas;
• apronta botos de abba e pannos issustos e chirca amparu in sos zassos prus a intro de sa domo; alena cun unu pannu issustu in buca;


Cando b'at prus perìgulu
- Su perìodu dae su primu de làmpadas a su bìndighi de santuagaine est cussu prus perigulosu pro su fogu in sos buscos.
In custu perìodu non si podent allumare fogos, nen mancu pro afoghizare istula!!
- In totus sos àteros meses de s'annu, foras de cussos inditados, sunt proibidas totus cussas atziones chi podent fàghere pigare fogu.

Cosas de fàghere pro prevènnere sos fogos -
AMMENTA!!!
- non nche fùlies dae sa màchina e non lasses in terra alluminos, tzicas e cale si siat àtera cosa allumada: s'erba sica chi b'est oru oru de sas istradas, de sas ferrovias ecc, podet leare fogu, duncas fulia.nche s'àliga in sos botos a posta;
- no abruses chimuza, paza e àteros resuzos de sartu sena leare totus sas mesuras de seguresa. Respeta sos inditos de sa Regione!! Ara bene unu cantu de terrinu totu a inghìriu ca in pagu tempus su fogu ti nche podet isfuzire;
- si sa màchina tua portat marmita catalìtica, non dda podes frimare subra chimuza, erba sica o àteru materiale chi potzat leare fogu a temperaduras artas;
- non lasses àliga in sos buscos e in sos muntonarzos abusivos. Podent leare fogu!!


CANDO PIGAT FOGU, S'ARRISCU DE DANNU NO EST PRO ÀRBURES E ANIMALES EBBIA, MA FINAS PRO TOTU S'ECOSISTEMA NOSTRU E, DUNCAS, FINTZAS PRO S'ÒMINE, CHI NDE FAGHET PARTE

Documenti allegati

Documenti allegati
Titolo  Formato Peso
ATENTZIONE A SOS FOGOS Formato pdf 198 kb
torna all'inizio del contenuto
torna all'inizio del contenuto