Vai a sottomenu e altri contenuti

Sas traditziones populares de Norghiddo

Sas traditziones populares de Norghiddo

Norghiddo e Domusnovas Canales tenent azumai totus sas traditziones populares de sos àteros comunes de Sardigna. Sa prima festa de s'annu est su foghilone chi si faghet pro Sant Antoni, est a nàrrere sa Tuva (unu truncu betzu de crecu), traditzione presente in casi totus sos comunes de su Guilcier ma chi tenet unu significadu de importu mannu in Norghiddo: est casi unu ritu pro sos zòvanos chi diventant mannos, òmines: sa tuva de sa leva noa est de interessu non de sos mazores ebbia ma de totus. Pro cumprèndere ite sutzedit si podet bìdere su film documentàriu ''Da Norghiddo a Norbello'', de Ignazio Figus e Giacobbe Manca''.
Sa Tuva dda faghent in sa pratza e, sa note intre su 16 e su 17 de ghennarzu, benit abrusada in dae in antis de totu sa zente reunida pro sa prima festa de s'annu. Su foghilone fatu a de note e sa pampa arta sunt de bonu augùriu pro tènnere a tesu sas cosas malas portadas dae sas notes longas de ierru, pro chi sa Nadura, sa Dea Madre Fèrtile, torret biatza cun s'arribu de su sole e de su beranu. Su simbulismu craru de sa tuva, cun truncu ''fallico'' postu cara a artu, rapresentat s'antigu cultu agràriu de sa fertilidade e sighit a bìvere comente ritu initziàticu pro sos pitzocos: - unu cultu antigu cantu sa sotziedade chi marcat su passazu dae una zeneratzione a s'àtera.
In Norghiddo sunt sighidos dae zente meda:
sos ritos de sa Candelora (su duos de freàrzu);
Su Carrasegare, cun ballos in pratza, màscaras, cursas de caddos, druches e àteros pratos de carrasegare;
Sos ritos de sa Pasca, cun sa professone de sa Via Crucis e sa solennidade de sa Dumìniga de Pramas.
Sa festa de Santu Zuanni (24 de làmpadas) cun sos ritos fatos in domo e cussos pomposos fatos pro sa zente e sa professone de sos cunfrades acumpanzada dae sos caddos.
Sos massàjos, a fine trìula, festant Santu Sidore. Bi leat parte zente meda e bi sunt finas sos jugos totu colorados, parados a festa cun coronas de frores de sartu.
Su bìndighi de trìulas est sa festa manna de sos patronos Santa Zulita e Santu Chìrigu, chi sa zente de Norghiddo tenet a coro meda.
Assortit zente meda a sa festa de Santu Innàtziu, su prus sa segunda dumìniga de Cabudanni, s'ùrtima die. Sas famìglias abarrant in sos muristenes de su novenàriu pro totu sa festa e, intre cantos, ballos e preghieras, retzint cun ospitalidade manna amigos e connoschentes.

Iscritu de Giacobbe Manca

Bibliografia
1. Un ampio racconto della vita di Norbello, dalle origini fino alla socialità dei giorni attuali, est in su volume ''Norbello e Domusnovas Canales, appunti di vita comunitaria, de G. Manca, A. Pinna, F. Parascandalo, M. Marras, 2004, publicadu dae su Comune de Norghiddo.
2. La storia di Norbello, il paesaggio, i monumenti e vicende sociali, feste e in particolare i riti attorno a Sa Tuva, sunt contados in su film documentàriu Da Norghiddo a Norbello, regia de Ignazio Figus, testos e narratzione de Giacobbe Manca, publicadu in su 2006 dae s'Amministratzione Comunale de Norghiddo.
Intelligente
perspicace

torna all'inizio del contenuto
torna all'inizio del contenuto