Vai a sottomenu e altri contenuti

Su territòriu

Su territòriu
Norghiddo e Domusnovas Canales
Norghiddo est a sa làcana manca de sa prana de su Guilcier e s'incorat, dae oriente a setentrione, in sa meravizosa e manna badde in ue passat su riu Siddu e in ue est posta sa biddighedda de Domusnovas Canales, chi faghet parte de su Comune de Norghiddo. Su paesazu sighit finas a oriente e inghiriat su lagu Omodeo (in ue passaiat su Tirso, su frùmene prus mannu); dae a tesu si bident sos montes de sa Barbàgia. In sa matessi prana, chi est a casi 350 metros subra su livellu de su mare, bi sunt fintzas sas biddas de Abbasanta e Bilartzi, chi sunt atacadas a Norghiddo e chi inghiriant in tundu totu sa badde de su riu Chenale, chi est comente unu parcu cafudu intre sas domos de sas tres biddas.
Territòriu
Su territòriu de Norghiddo est particulare pròpiu pro su fatu ca sas tres biddas sunt totus atacadas; est longu pagu prus de 10 Km, casi comente unu passazu mannu, postu a nord ovest - sud est e largu prus o mancu duos km e mesu; si nch'illargat cara a bassu, in ue ddue est Domusnovas. Su territòriu est saliosu, est mannu 2.620 ètaros, totus pastinados o postos a pastura. Su territòriu de Norghiddo est unu cantigheddu, in paris, de su Montiferru.
Geologia
Sas erutziones pleistocènicas e pliocènicas de su vulcanu a canta ant formadu su pizu de sos basaltos e de sas ''ignimbriti'' chi si bident in superfitze. In dae suta b'at istratos miocènicos de rocas de calcare e arenària cun àteras rocas chi si sunt formadas in su tempus cun avantzos de organismos; custos si podent bìdere in sos muros de sos calancones e in sas caladorzas de sas baddes mannas chi si sunt apertas cando sos oros de sa prana si sunt segados, a pustis de sos aundamentos. In sa badde de su Tirsu, in ue oe ddue est su lagu Omodeo, in fundu b'at truncos de matas fòssiles, chi nd'essint a pizu in ue su terrinu est prus fresadu.
Ambiente
In su territòriu de Norghiddo bi sunt buscos de crecu, de èlighe e suerzu, orzastos, matas de surzaga, de ulmu e de pirastu ma agatamus fintzas molas de chessa. De murta e lidone si nd'agatat prus pagu mentras de orzastu non bi nd'at casi nudda. Terrinos a pastura, in ue bi sunt fintzas matas de crecu e suerzu, nd'at medas; in unas cantas partes de su territòrio bi sunt olivàrios e binzas, chi non sunt mai mannas meda. Sos produtos de s'agricoltura e de sa pastorìtzia sunt connotos pro sa buntade issoro.
Su territòriu est prenu de puzones, rodidores, mustèlides, matzones, sirbones. Bi sunt allevamentos medas de berbeghes, porcos, bacas ma finas de caddos seletzionados de ratza anglo-àrabu-sarda
Tzinnos de idrografia
Su territòriu de Norghiddo est particulare e saliosu fintzas gràtzias a sos rios, sas benas e sos pojos in ue abarrat s'abba pro tempus meda cando proet, comente si podet bìdere a Crachèriga (a canta a sa bidda), in Sa Paule ‘e s'Istoia (su prus mannu, sicadu pro sa prima borta in su 1870), a Sant'Innàtziu ma fintzas cara a bassu, a curtzu de su nurache Truischea e in medas àteras partes.
Su frùmene prus mannu est su Siddu (in su ‘800 fiat tzerriadu Funtana Majore), un'afluente de importu de su Tirsu. In su caminu suo su Siddu (su nùmene benit dae cussu de su deus Sid, metàtesi de su fenìciu-Pùnicu Bahal) nde leat sas abbas dae unos cantos ritzolos in antis de si nche betare in su lagu artifitziale Omodeo.
Sas benas prus importantes de su territòriu sunt cussas de Suei, a canta a sa bidda e semper prenas in àteros tempos, custas sunt postas in ue naschet sa cora de su riu Benas (su nùmene benit dae ''bena''). Àteras benas semper bias, dae nord a sud, sunt cussas de Orconale e Montigu, S'Àinas, Sos Bidiles, Ampridorzos, Àlinos, de Seurra e de Sella o Mulinu ‘Etzu. Dae custa, fintzas a una deghina de annos faghet, nde leaiat s'abba sa zente de Norghiddo e de Domusnovas; sa traditzione populare narat ca faghet bene pro sanare sos malàdios.
Iscritu dae Giacobbe Manca

Bibliografia
1. Un ampio racconto della vita di Norbello, dalle origini fino alla socialità dei giorni attuali, est in su volume ''Norbello e Domusnovas Canales, appunti di vita comunitaria, de G. Manca, A. Pinna, F. Parascandalo, M. Marras, 2004, publicadu dae su Comune de Norghiddo.
2. La storia di Norbello, il paesaggio, i monumenti e vicende sociali, feste e in particolare i riti attorno a Sa Tuva, sunt contados in su film documentàriu Da Norghiddo a Norbello, regia de Ignazio Figus, testos e narratzione de Giacobbe Manca, publicadu in su 2006 dae s'Amministratzione Comunale de Norghiddo.

torna all'inizio del contenuto
torna all'inizio del contenuto