Vai a sottomenu e altri contenuti

Temporada e lampos

Si ddu at temporada e lampos

Ista atentu ca, a bortas, una temporada lompet in presse, non dat su tempus de andare in logu seguru.

Prima

verìfica sas cunditziones de su tempus giai cando ses ponende in contu un'atividade in logu abertu, comente andare a su sartu, andare a piscare, un'escursione in monte, abbàida prima sos bulletinos de previsione de sos ufìtzios meteorològicos cumpetentes;

ammenta ca, cun antìtzipu bastante, non faghet a ischire de pretzisu cando e in ue at a capitare una temporada.

In logu espostu, cando incomintzat a lampare e/o a tronare

si bides lampos, ispètzie si est a s'iscurigadòrgiu e a su note, fintzas si sunt a largu meda, istesia·ti in presse;

si intendes tronos sa temporada est a pagos chilòmetros e, duncas, est acanta.

Cando est arribende una temporada

osserva de sighidu sas cunditziones de su tempus, pone atentu si ddu at signales chi faghent cumprèndere chi est arribende una temporada:

- si b'at nues cumuliformes chi tenent puntas mannas chi s'isvilupant a manera verticale, e mancari sa dies a badde est bascosa, est mègius a non s'istentare in giassos abertos e espostos (comente su cùcuru de unu monte o s'oru de su mare o de su lagu);

- torra a organizare sa die tua: si ddu at signales non cheret nàrrere ca de seguru est arribende temporada mala, mancari non sutzedet nudda, ma cando arribat, su tempus pro andare in logu seguru at a èssere pagu meda, su prus de sas bortas no at a bastare.

Si ddu at lampos e temporada paris

Unu perìgulu de tìmere de prus est cando ddu at temporada cun lampos. Su prus de sos intzidentes causados dae sos lampos càpitant in logu abertu: su monte est su logu prus perigulosu, ma fintzas sos giassos espostos, e de prus di ddu at abba, comente acanta de su mare, in sos pontiles, sas piscinas postas in foras. Cando est lampende ddu at fintzas unu tzertu arriscu a intro, in logu serradu. Ddue podet àere lampos fintzas sentza pròere.

In logu abertu

- abarra a tesu dae palos, àrbores o sìmiles: non chirches amparu cando est proende in suta de sas matas, e prus pagu si sunt artas meda o semper e cando prus artas de sas àteras acanta;
- non toches cosas cun condutividade elètrica bona;
- chirra·ti·nche dae dossu sas cosas de metallu (aneddos, cannacas, lòrigas e àteru chi podent causare brusiaduras);
- abarra a tesu fintzas dae sos palos de sa tensione arta, ca sos lampos - atirados dae sos cavos elètricos - pasant in sos palos pro s'iscarrigare a terra.
- Si una temporada t'atzapat:

In monte

Cala a bassu, non nche passes in giassos espostos, comente in sos cùcuros; firma·ti luego luego si ses faghende un'iscalada e, cantu prima, arriba a unu caminu prus in bassu, est mègius chi ti movas in canales e giassos cuerrados;

si podes chirca amparu a intro de una gruta - istesiadu dae s'intrada e dae sos muros - o de unu fràigu, si no atzapas mègius fintzas unu corcadòrgiu in foras o unu fenile, abarrende semper a largu dae sos muros;

Cando as agatadu su logu seguru - o si depes abarrare in foras:


- Abbibbirina·ti cun sos pees unidos, abbassa·ti cantu prus faghet, pro non èssere unu paralampos, pro minimare s'intensidade de sa currente chi podet passare su corpus tuo.
- Non ti corches o setzas in terra, e abarra prus o mancu a deghe metros dae sas àteras persones.

- Non t'ispostes cun funes e iscalas metàllicas;

- Si podes, chirca reparu a intro de sa vetura, e tene sas portieras e sos bidros serrados bene e, si faghet, abbassa s'antenna de sa ràdiu;

- lìbera·ti de sas ainas de metallu;

In mare o in su lagu

- non toches e non t'acostes a s'abba, ca favoresset sa difusione de sas càrrigas elètricas: su lampu, podet causare dannos mannos fintzas pro lampigiadura a manera indireta, fintzas a tesu metros meda dae in ue est caladu;
- essi luego luego dae s'abba;
- istesia·ti dae s'oru de su mare o de su lagu o de una piscina in foras;
- libera·ti de paracos, ombrellones, cannas pro piscare e cale si siat àtera cosa a punta de mannària mesana o manna.

In campègiu

Durante sa temporada, est mègius a si repare in unu logu fraigadu, comente sos servìtzios de su campègiu.

Si ses a intro de tendas e podes andare in un'àteru giassu:

- non toches sas partes de metallu e sa tenda etotu;
- non toches cosas de metallu collegados a s'impiantu elètricu; est oportunu a nche istacare dae sa currente elètrica sas aparechiaduras elètricas;
- isola·ti dae su terrinu cun cale si siat materiale isolante a disponimentu.

In domo

A intro de domo s'arriscu de sos lampos est minimadu meda ma, cando ddu est una temporada, est bene sighire su matessi carchi règula sèmplitze:

- non imprees aparèchios atacados a sa rete elètrica e su telèfono fissu;
- lassa istudados (mègius fintzas istachende s'ispina), prus che totu su televisore, su computer ma fintzas àteros eletrodomèsticos;
- non toches cosas de metallu collegadas in foras, comente cunduturas, tubos, calorìferos e impiantu elètricu;
- non toches abba (pro nàrrere: ispeta a cando finit sa temporada a fàghere s'istèrgiu o a ti fàghere sa dòtzia, su prus de sas bortas bastat ispetare una o duas oras);
- non ti firmes suta de istàulos e balcones, pone·ti a intro de s'edifìtziu e abarra a tesu dae muros, ghennas e ventanas, e assegura·ti chi ghennas e ventanas siant serradas.

Dae su situ de sa Protetzione Tzivile

torna all'inizio del contenuto
torna all'inizio del contenuto