Vai a sottomenu e altri contenuti

1 novas de su Guilcer

Comune de Abbasanta Comune de Aidumajore Comune de Boroneddu
Comune de Ilartzi Comune de Norghiddo Comune de Tadasune

Isportellu Linguìsticu Subracomunale

Progetu Lege Regionale 6/2012 - Annualidade 2012

Novas de su Guilcer 2016 (1)

Newsletter periòdica de informatzione in limba sarda e in contu limba sarda

At torradu a abèrrere s'isportellu de sa limba sarda

Gràtzias a unu finantziamentu de sa L.R. 6/2012 arribadu a su Comune de Norghiddo, capu-fila de su progetu chi ponet paris sos Comunes de Abbasanta, Aidumajore, Boroneddu, Ilartzi, Norghiddo e Tadasune, at torradu a abèrrere s'isportellu linguìsticu subra-comunale. Su servìtziu naschet pro respòndere a sos bisòngios de sos amministradores, de sos dipendentes comunales e de sos tzitadinos chi chèrgiant impreare sa limba sarda in sas fainas de sos Comunes o in sos raportos cun sos Comunes.

S'operadora de isportellu est a disponimentu fintzas de sos tzitadinos, maistros de iscola, professores, istudiantes e assòtzios pro cale si siat informatzione, aprofundimentu, duda, curiosidade, bibliografia, sitografia in contu de sa limba sarda, pro consulèntzias in sa carrera didàtica, in cussa giurìdicu-normativa e pro cussìgios chi pertocant sas règulas de iscritura de su sardu.

S'ufìtziu, contivigiadu dae sa Sotziedade Cooperativa L'ALTRA CULTURA de Aristanis, est in sos locales de su Munitzìpiu de Norghiddo e aberit in custu oràriu:

su lunis 08.30/14.00 - 15.00/18.00 sa giòbia 08.30 - 14.00

***************************

Su PLUS Distretu Ilartzi Bosa, faghet ischire a sos tzitadinos, ca dae su 2 de cabudanni 2016, podent presentare in s'àmbitu de su sustegnu a s'inclusione ativa, sa domanda pro sa Carta Acquisti SIA noa, comente agiudu a sas famìlias cun fìgios minores e/o disàbiles non bastantes pro se e fèminas prìngias atzertadas. Pro informatzione domandare a s'ufìtziu sotziale de su comune de residèntzia o a su nùmeru riservadu 389 0087090. In prus, si faghet ischire ca sas domandas s'ant a valutare in òrdine de arribu leende in cunsideru sa data de presentatzione e fintzas a s'acabbu de sas resursas a disponimentu de sa Regione Sardigna.

***************************

Comune de Norghiddo

Si comùnicat ca pro problemas in su tènnere s'ISEE, s'iscadèntzia de su bandu pro su rimborsu de sas ispesas de viàgiu de sos istudiantes, chi in s'annu iscolàsticu 2015/2016 ant frecuentadu sas iscolas segundàrias de 2° gradu chi non ddue sunt in su territòriu Intercomunale, est trantzida dae su 19.08.2016 a su 9 de cabudanni 2016. Sa modulìstica si atzapat in sos ufìtzios comunales.

Comune de Abbasanta

Su Comune de Abbasanta at abertu su bandu pro sos contributos a favore de sas sotziedades e assòtzios diletantìsticos isportivos chi òperant in su matessi Comune.

Sos interessados podent presentare sa domanda a s'ufìtziu protocollu, prima de sa una (h 13,00) de su 31.08.2016.

Sos assòtzios depent tènnere sede legale/operativa in su Comune de Abbasanta; fàghere atividade isportiva de sighidu; tènnere non prus pagu de 10 atletas iscritos e residentes; èssere assotziados a una federatzione isportiva reconnota dae su C.O.N.I. o dae Entes reconnotos pro su 2015 dae su C.O.N.I..

Paris cun sa domanda, chi depet èssere cunforme a su modellu cuncordadu dae su Comune e firmada dae su rapresentante legale de sa sotziedade o assòtziu isportivu si depent presentare sa fotocòpia de unu documentu de identidade vàlidu de su rapresentante legale; si su Comune non ddu tenet giai e si est istadu mudadu, s'atu costitutivu e s'istatutu de s'assòtziu; si sunt cambiados, sos nùmenes de sos chi tenent sas càrrigas sotziales; su bilàntziu preventivu 2016 e su consuntivu 2015, aprovados a manera regulare dae sos òrganos sotziales; sa relatzione de s'atividade fata in su 2015; sa tzertificatzione de afiliatzione 2015 a sa federatzione isportiva; sa tzertificatzione de sa federatzione - o s'autotzertificatzione - chi atestat sos annos de sa sotziedade o assòtziu; s'elencu de sos tesserados; sa decraratzione cunforme a su D.P.R. n. 445/2000.

Cale si siat informatzione si podet pedire a s'Ufìtziu Biblioteca Pùblica Istrutzione e Isport, in sa Biblioteca Comunale, in sa carrera Gramsci, tel. 0785 54261 o a s'impiegada Angela Maria Licheri in custas dies e oràrios: martis, su 30 de austu 2016 10.30 - 13.00; mèrcuris, su 31 de austu 2010.30 - 13.00.

Su bandu e su modellu de sa domanda si podent iscarrigare dae su situ Internet de su Comune de Abbasanta: www.comune.abbasanta.or.it

Comune de Boroneddu

In su Comune de Boroneddu dae su 1 de austu a su 25 de cabudanni si podet pònnere sa firma pro FIRMA SU FOGU, sa petitzione populare pro chi sa Regione: aprontet atziones de sensibilizatzione pro firmare sos fogos; afòrtighet su sistema contra de sos fogos comporende una flota de Canadair e elicòteros a s'avanguàrdia de tènnere semper in Sardigna; cuncordet un'initziativa regionale de lege pro adeguare sa pena pro su fogu dolosu (voluntàriu) in sos padentes cun cussa previdida pro su reatu de istrage e aprontet mesuras pro assegurare chi sos responsàbiles iscontent de seguru sa pena.

Pro firmare chirca unu funtzionàriu de su Comune.

(Campagna a incuru de Liberos Rispetados Uguales LIBE.R.U.)

***********************************************************************************

Sa redatzione de Novas de su Guilcer est contivigiada dae su Servìtziu linguìsticu sardu -capufila su Comune de Norghiddo

(operadora Marinella Marras Sotziedade Cooperativa L'ALTRA CULTURA)

torna all'inizio del contenuto
torna all'inizio del contenuto